撰文：小德

切勿心浮氣躁

咁邊八件事一定要做呢？今日就同大家逐一介紹，根據《天下至道談》中記載，八益者是指：「一曰治氣、二曰致沫、三曰知時、四曰蓄氣、五曰和沫、六曰積氣、七曰持贏、八曰定頃。」由於當中提及氣，有人認為與氣功神秘學說有關。

其實又唔使講到咁神秘，講白佢其實十分簡單，反而與西方性心理學有異曲同工之妙，現在逐一分析。第一要治氣，就係要整治自己嘅情緒，如果冇心情或者太過心急，都不適宜性交，萬一真係咁樣情況，就要好好對付佢，所以叫做治氣。第二就係致沫，就係睇吓自己有冇口水，有啲人會口乾乾，表示腎氣不足，可能係啱啱長途跋涉趕返屋企，不妨先飲啖茶休息吓，見有口水充盈口腔，先至再進行性交。

腎氣足口水盈

第三係知時，就係搵一個適合嘅時間性交，古人認為亥時最好，即係晚上9點至11點，但家陣邊有人咁早瞓，其實只要搵個大家適合嘅時間就可以。第四係蓄氣，有人認為要練氣功至性交，其實呢度係叫大家培養氣氛情緒，切勿急於一時。第五就係和沫，有人話要吞口水壯陽，因為口水係腎氣化成，其實係講男女交合前要濕吻，等大家啲口水都互相和合。第六就係積氣，呢度係指性交前要做前奏工夫，即係進行愛撫動作，讓心理生理都作出充分準備。第七就係持贏，到戲肉時，男士要有正確嘅心態，希望性行為中雙雙都能獲得高潮，不可偏向一己之慾。最後係定頃，就係要有節制，完事後就要好好休息，聽落係咪好啱聽、好實際呢！所以房中術根本一啲都唔神秘。