擺明三陪

早前有關剩男剩女嘅問題受到內地社會關注，有民間團體仲專登搞咗個光棍節，借呢個機會等剩男剩女們多多出街活動，好讓佢哋自己搵伴侶。為咗令佢哋能夠早日成親，有調查亦指出近期有好多婚姻介紹所成立，幫助佢哋之餘，又可以做生意。然而，有消息表示，惠州出現做法唔多正常嘅婚介所。曾經到過該間婚介所嘅王先生話，睇到佢哋嘅廣告，於是就打電話過去，不過電話入面嘅中年婦女就話：「我們會為會員提供異性，向會員陪聊、陪玩、陪睡。」好明顯就係推銷緊三陪女郎啦！王先生好奇之下，真係去該間婚介所一探究竟。一去到，見到婚介所只係一間唔夠二百呎嘅舖頭仔，裏面放咗幾張木枱同木椅。而見到王先生出現，入面嘅三位中年女人就即刻上前招呼，仲老闆前老闆後咁稱呼添！

套房中介

其中一位中年女人率先話：「老闆！你是來找對象的嗎？請坐。」王先生坐低之後，中年女人就表示，佢哋有不少年約二十幾歲嘅女會員，皮膚白滑，身材又好，畀佢哋陪過嘅會員都話招呼一流，風騷入骨。王先生一問價錢，對方就話婚介所只係收四百蚊人仔做入會費用，其他就可以同女會員自行面議。中年女人及後又話，婚介所仲可以幫手安排套房，畀王先生同對象上房談心，培養感情，如果需要服務可以即刻帶王先生上套房，再電召對象上嚟咁話。跟着中年婦人就開始翻開手中嘅相簿，畀王先生挑選對象。期間，中年婦人又表示，佢哋仲可以幫會員搵對象生BB，只要事後畀一筆所謂「借生費」就搞得掂。王先生對生仔冇興趣，所以都係專心揀對象上房試三陪服務。

撰文：賢