合約嚴禁陪睡

內地規定聘請傭工時，都要簽僱傭合約，講清楚工作範圍、報酬和福利等事宜，有識之士見「陪睡保母」嘅問題日益嚴重，於是喺網上倡議，喺合約上聲明不可以「陪睡」，以阻止不良風氣蔓延，佢嘅論據就係家陣女工跟男主人陪睡，有關監管部門係無權阻止，就算有人舉報，佢哋都唔可以插手干預，但如果寫明在合約內，如果任何一方違反規定，有關部門就可以執法處理。

呢種以行政手段遏止歪風嘅做法，用心係好，但似乎有啲小題大做，就算真係立案執行，都要有人舉報，有關方面至可以去處理，咁邊個去舉報呢？如果男女雙方本身已有配偶，其實可用婚姻法去處理，唔使用勞工條例去監管。

侵犯個人私隱

但如果男未婚，女未嫁，兩人你情我願，你個部門走去管人嘅家事，真係有點那個，何況僱傭合約雖然有範本，但一啲具體內容，仲可以自行增減，你可以要求事前寫明不可陪睡，但亦有人可以寫明可以陪睡，咁咪盞得個搞字，所以呢個以合約條例嚟遏止歪風嘅做法，最後吵吵鬧鬧一輪之後，就不了了之，雖然未有結論，但畀人睇到社會大眾對事件已經開始注意 。

有人極力反對，覺得係傷風敗俗嘅事，應該盡一切辦法去遏止，但亦有人覺得只屬私人嘅事，不應侵犯個人私穩，而且後者佔嘅比例較大，證明現今內地巿民都十分關注個人權利，講真，如果你情我願，又冇破壞婚姻法，阻止佢嚟做乜嘢！

撰文：小德