實地體驗

內地旅遊業近年急速發展，所以唔少大老闆都趕住興建酒店，以迎合龐大旅客嘅需求。不過，唔少旅客對內地嘅酒店服務水準都有微言，認為水準依然未令人滿意。

為咗令旅客們對入住嘅酒店有初步認識，了解到酒店係咪啱自己，所以近期就出現咗一個新職業名為試床員，又稱為酒店品評家。試床員一般都係由旅遊資訊網招聘，工作內容主要係透過實地體驗，同時拍低酒店嘅照片，以便撰寫一個有關酒店嘅報告，幫助消費者了解酒店特色。由於工作關係，會由公司出錢請去旅行，加上月薪達到一萬蚊人仔，所以試床員被視為一份筍工。不過，試床員當中仲有好多人唔知足，實行兼職搵外快，陪客人一齊去旅行試酒店。

網上勾搭

家陣嘅旅遊人士好精明，每次旅行之前都會上網搜查大量有關目的地嘅資訊，同時亦會透過旅遊資訊網訂機票同酒店，令整個旅程玩得開心又舒服。自從試床員出現之後，旅客仲可以上網查到試床員對酒店嘅評估報告。不過，當中竟然發現有部分試床員會於網上留言，聲稱可以同客人去旅行，仲表示可以一齊入住同一間酒店房作實地考察，更加可以共用一張床，一齊試吓浴室沖涼夠唔夠舒服，做到真正為客人試床嘅目的添！

只要有客人留言表示答應，二人就會約好地方等候一齊出發，直往內地嘅酒店，當然，一男一女共處一室，有咩事會發生就唔使多講啦！有消息指出，呢類試床員報告，唔排除係由援交女撰寫，目的當然係為咗搵客賺錢啦！所以，大家如果去到內地嘅旅遊資訊網，見到有關試床員報告都真係要考慮一下係咪可信喇！

撰文：賢