搭訕潮流化

「搭訕」點解相信唔使多作解釋，而「搭訕教主」就係嚟自台灣，有個名主持人兼作家鄭匡宇，佢出咗一本《搭訕聖經》教人識女仔，喺內地十分熱賣，而佢就自稱為「搭訕教主」，意思即係話自己好識得追女仔。

其實喺廣州之前，內地有好幾個大城巿都辦過呢啲培訓班，最先嘅係一個叫魔鬼諮詢師辦嘅「魔鬼搭訕班」，而重慶就有一個「泡學培訓班」反應都十分熱烈，其實呢啲班，就係教大家識女仔，唔好再做宅男，學員經培訓後，就變成一個識到女仔嘅「搭訕教主」，真係想唔到識得「搭訕」，家陣竟成為潮人嘅象徵，難怪呢啲搭訕培訓班喺全國遍地開花啦。

改變有價

講番廣州呢個培訓班，課程分理論同實踐課，理論課主要講心理準備、衣服裝扮、開場白技巧等，第一堂通常都係免費或者只收一百幾十蚊，由於價錢便宜，於是好多人報名參加，但到咗實踐時就會一敗塗地，事後就會返中心檢討，呢個時候主辦者就會鼓勵學員報讀精進班，由於學員啱啱慘嘗失敗滋味，於是都想繼續進修。

而呢啲精進班一般係兩三日嘅課程，收費就由一千到四千元不等，都幾貴吓，但學員為咗成功、為咗做潮人、為咗識到女仔，都會在所不惜，至於進修班，理論會更深入，由講嘢咬字、衣着打扮，話題探討等都會幫你執晒，到實踐課仲會由導師出馬幫你出手，一定要成功識到女仔為止，攞到電話就成功畢業，畢業後學員係咪真係做到「搭訕教主」真係唔知道，但溝通能力同自信心大咗，就係不爭嘅事實。

撰文：小德