愈肥愈吸引

由於近年流行纖體，個個女性都搞到自己得番棚骨，以為好靚，但實際嚴重影響自己嘅身體健康，特別婚後，問題更會陸續出現，例如身體太瘦嘅女性，性慾方面明顯會下降一兩成，美國聖路易斯大學就搵兩批老鼠做過實驗，證明愈肥嘅老鼠，佢哋嘅交配率愈高，專家話同雌激素有關，身體過瘦或者經常做大量運動嘅朋友，身上嘅雌激素就會減少，影響性慾。

而呢個實驗中，亦睇到老鼠公特別受肥老鼠乸嘅吸引，有專家認為無論人類或者動物，佢哋交配嘅首要任務，就係要繁殖下一代，所以會特別受性功能良好嘅異性吸引，所以一睇見啲肥壯嘅異性，就會特別容易受到佢哋嘅吸引，同佢哋發生關係。

性功能下降

此外，有專家認為，大量減低雌激素，除咗影響性慾之外，仲會影響性行為嘅過程導致不良效果，有大量證據表示，女性如果雌激素水平正常，喺整個性交過程中陰道嘅收縮同埋分泌物都會十分正常，幫助女性進入高潮，享受快感，但如果女性雌激素水平偏低，陰道嘅收縮感同埋分泌物就會降低，有部分女性更會出現陰道乾燥，喺性行為時出現痛楚嘅感覺。

所以專家認為，有少少肥嘅女性最好，因為雌激素可以保持一定水平，除咗會多啲人追求同埋好好享受性交之外，日後對懷孕、生產、餵哺小朋友都會有幫助，所以唔好成日話減肥啦！

撰文：祖