據講喺香港搵牛郎又貴又冇選擇，但返上深圳，就乜嘢類型嘅帥哥都有，價錢仲十分超值，於是唔少闊太、中女，都會返深圳搵帥哥嚟慰藉空虛，深圳近年就出現龐大嘅牛郎巿場。有啲害群之馬，就乘機布局搵應徵者着數，就好似上星期深圳警方就人贓並獲，拉到一個詐騙團伙，喺佢哋嘅記事冊裏面，就搵到67名受害者，騙取金額高達四萬幾蚊。
交留位費
呢班老千會喺一啲小報或者街上貼上招聘街招，告之某大俱樂部大量招聘男女公關，一般只留電話查詢，當男應徵者致電過去，就有人負責游說應徵者加入，主要都係話女人嘅錢好易賺，仲可以財色兼收，有本事一個月賺到幾萬蚊，諸如此類。應徵者心動之後，對方就會提供一間酒吧嘅地址，叫佢哋去見負責人，而負責人係個中年嘅男士，聲稱係俱樂部嘅經理，現在裝修當中，之後就講啲實際工作情況，最後就遊說應徵者要交數千元嘅押金，可以正式開業才交，但現在要交少少留位費。
富婆培訓
一般應徵者都會乖乖畀一至五百元嘅留位費，但如果仲猶豫，負責人就會直指應徵者冇經驗，會安排富婆嚟幫新人培訓，但為免得失客人，要先交一筆保證金，萬一得失客人則用作賠償，應徵者交上後，就會喺某月某日再叫佢哋嚟畀富婆培訓。富婆係個中年婦女，主要就係負責數應徵者嘅不是，例如衣服、談吐、外貌等，負責人就會要求應酬者再揼本執執佢，但執完又話其他唔得，搞到冇錢執為止，咁之前交嘅錢就會充公，而所謂富婆被拉時身上50蚊都冇，就係咁都呃咗67人，騙咗成幾萬蚊，咁嘅屎橋都有人中招，班友仔真係要反省吓。
撰文：小德