生財有道

乜嘢係「龍舟嘴」？就係平時放鬆個口，而兩邊嘴角自然上翹嘅嘴形，遠睇好似一隻艇咁樣，相學中就叫佢哋做「龍舟嘴」，無論男女，擁有呢種嘴形都會財運特別好，而且人緣極佳，桃花運可以由年輕時一直旺到七八十歲，絕對魅力沒法擋。

女性朋友若擁有「龍舟嘴」，表示佢一生衣食無憂，財星高照，就算唔打工只靠老公微薄家用，佢都會生財有道，十年八載後，自然會變成一大筆私己錢。性格方面為人樂觀，責任心重，處處只為人着想，如果出嚟打工，係老闆心目中嘅好伙記。

而男性朋友口如龍舟，就表示其人講嘢風趣幽默，天生係一個講嘢高手，樹上邊嘅雀仔都可以氹佢落嚟，從事靠口搵食嘅工作，一定大派用場，加上嘴角上翹，經常笑容滿面，很容易就俘虜異性嘅歡心，所以異性緣超強，要直至行完嘴運至停止。

運程減半

但要留意，話明「龍舟嘴」，要求似一艘龍舟，即係把口要夠闊大，嘴嘅大小點樣嚟區分呢？係以雙眼嘅瞳孔，齊齊向下拉一條直線，如果嘴角貼線咁就合格，如果嘴角未貼到線，咁就代表嘴細，所有好嘢都只能減半應驗。

另外，有些相學家稱笑起嚟嘴角明顯上翹都算係「龍舟嘴」，唔一定係合埋口嘅至算，其實都可以咁解釋嘅，但關鍵要睇佢一唔笑時嘴角線會指去邊到？如果同普通人一樣指向兩邊，咁問題不大，但如果係向下彎呈「覆舟嘴」嘅，咁想發達都難。

撰文：小德