唔食唔得
呢兩位咁重視食早餐嘅囡囡，分別係20歲嘅JoJo同埋21歲嘅Winnie，我哋先問吓成日瞓唔醒咁嘅樣嘅JoJo，點解會咁重視食早餐呢？JoJo話：「以前阿媽每日都會煮早餐畀我食，食咗十幾年，唔食會唔習慣。」
但家陣已經冇同阿媽住，咁邊個煮早餐畀你食呀？JoJo話：「咪出街食囉！我食早餐一啲都唔揀擇，白粥又得，麵包又得，麥皮又得，甚至即食麵都可以，只要食咗啲嘢落肚，咁我就會瞓得着，唔會囉囉攣。」
JoJo話自己最愛夜蒲，每晚唔玩到天光都唔瞓，但臨瞓前一定要食嘢，如果唔係就算點攰都好，佢都會囉囉攣瞓唔着，所以有時就算攰到死，佢都要爬落街食個早餐至可以瞓得着，果然係唔食早餐唔得嘅怪人。
食完就瞓
但係咁食法唔怕肥咩？JoJo話：「我曾經驚過，但發覺咁樣每日食三餐，身體一啲都冇肥，反而仲Fit咗。」唔知食早餐時使唔使人陪呢？JoJo話：「千祈唔好，好多時玩完都有朋友叫我去食早餐，我一定唔去。」
點解呢？JoJo話：「因為有人請嘅話，一定會唔忍得口，食得太飽，反而會瞓唔着，而且啲男仔請埋你食早餐，就一定想有下文，玩咗成晚咁攰，邊有心情吖，都係自己大覺瞓好啲。」JoJo咁醒目，認真難埋身。
至於另一位靚女Winnie，佢話自己冇JoJo咁幸福，日日有人整早餐畀佢食，相反，佢自從七歲開始，就日日整早餐畀細佬妹食，一直到幾年前出嚟打工，以為從此唔使再整早餐，點知識咗個男仔日日都要食早餐。
水蟹做早餐
Winnie話：「你哋咪心邪，我呢個男朋友係正當人家，所以每日都要喺屋企食過早餐至返工，於是我咪日日晨早起身整早餐畀佢食囉，冇其他意思嘅！」咁Winnie最拿手嘅早餐係乜嘢呢？Winnie話係腸仔煎雞蛋。
另外Winnie煲粥都好拿手，其中水蟹粥同埋鮑魚雞粥就最撚手，Winnie話：「前男友喜歡食鮑魚同埋水蟹，於是咪將呢兩樣嘢加埋喺粥裏面，等佢食早餐都可以食到喜歡嘅食物囉！」咁為得男友，果然賢惠。
可惜最後兩人因性格不合分手，但由於日日整慣早餐，所以家陣Winnie就算幾忙幾攰都好，一天光就整早餐，整完食埋至瞓覺，由於食得多，所以個肚腩仔都現咗出嚟，Winnie話：「其他兩餐要食少啲至得啦。」
Winnie小檔
年齡：21歲
興趣：整早餐
三圍：35、24、33
JoJo小檔
年齡：20歲
興趣：食早餐
三圍：34、23、34
撰文：小德
攝影：強