撰文：小德

舊瓶新酒

呢間以中式茶室為賣點嘅風俗店，就叫做「涉谷茶室」，其實前身係一間浴室，提供伴浴同埋出火服務，但近年生意一落千丈，於是換咗老闆，新老闆決定搞啲新意思，於是搵嚟風俗網編輯石川先生幫手。

石川話：「我開頭都有啲意外，但個老闆話係我哋網站嘅長期讀者，對我哋嘅點評好有信心，今次自己做老闆，一於搵我哋嚟幫手，我哋起初都有啲擔心，但經老闆再三請求，我哋至答應做今次嘅顧問。」

點解會由浴室變為茶室嘅？石川表示：「我同老闆商量嘅時候，正好去咗一間茶室飲中國茶，裏面布置高雅，令人精神鬆弛落嚟，睇住茶師表演，然後再歎一口茶，發覺味道完全唔同晒，於是畀到我哋靈感。」

冇人投訴

乜嘢靈感呢？石川話：「有啲嘢你愈心急，就愈冇味道，所以我哋決定繼續做浴室，但加入茶藝演出，讓浴娘半裸咁先替客人泡茶，當客人歎完茶之後，再慢慢同佢沖涼洗身，咁樣做一定可以令客人回味無窮。」

但要班囡囡做多樣嘢，佢哋冇詐型咩？石川笑笑口話：「佢哋當然冇詐型，事關工作時間同以前一樣冇變，例如九十分鐘服務，以前要做足九十分鐘，但家陣泡茶都泡十零分鐘，佢哋變相舒服咗，仲點會投訴。」

但日本囡囡好多都唔識泡茶，係咪要搵師傅教佢哋？石川話：「起初老闆都有啲擔心，後嚟我哋搵到間茶葉供應商，佢答應只要用佢嘅茶葉，就可以免費派人教啲囡囡茶藝，佢哋十分專業，教三四堂全都學識。」

醉翁之意

開業之後，據講反應好好，究竟點解呢？石川話：「我哋打正招牌叫做茶室，裏面有囡囡替你泡茶，歎完之後，仲有沖涼服務，客人覺得一個價錢，有兩種享受，絕對值回票價，所以推出之後生意十分好。」

如果老闆照用浴室嘅招牌，但加送茶藝服務，情況可能會啱啱相反，因為客人一心嚟沖涼，你做其他嘢，一定畀人鬧死，但家陣換咗係茶室，客人諗住嚟歎茶兼抽水，點知仲送埋沖涼服務，仲有邊個客人會詐型。

最後問吓石川啲客人對飲中國茶有乜反應？石川話：「多數都係讚，可能我哋啲中國茶本身用料夠靚，飲落甘醇，加上客人醉翁之意不在酒，所以個個都有讚冇彈。」所以話只要花啲心思，要成功又有幾難吖！