身邊有個姊妹，一直希望搵番個事業型男友，最近終於如願以償，畀佢識到個某大公司嘅太子，男方相當有錢，出入名車代步，食住都極盡豪華，而姊妹亦都獲得唔少好處，拍拖三個月，只見佢一身名牌，就連手上嗰部手機都係最貴、最新款嘅，實在令人羨慕不已。
最近，我喺尖沙咀遇到呢個姊妹，見佢一個人孤苦伶仃，愁眉苦臉，難道同男友鬧交？細問之下，發現兩人關係並冇問題，只係佢男友工作太忙，根本冇時間去陪佢。姊妹話：「我男友實在太忙，佢每日工作十幾個小時，收咗工又要去應酬，返到屋企已經攰唔多想郁，通常食飯就話瞓覺，就算放假，佢又話要陪屋企人，想二人世界都難。」不過，姊妹又話重點係佢哋自從拍拖第一個禮拜搞過一次，之後就冇再做過，有需要嘅時候，惟有靠自己雙手解決，佢話雖然可以暫時止渴，但感覺始終唔夠實在，亦難以紓解內心嗰份寂寞。
聽過呢個姊妹嘅遭遇，我實在無話可說，無錯，溝番個有錢仔，的確可以滿足到你物質上嘅需要，但係幾乎每晚都係一個人過，根本就同冇拍拖一樣，況且生活係要關乎於性生活質量及親密關係指數，性生活唔協調，就會好易令兩人感情出現問題，除非你本身係一個超級拜金主義者，否則都好難頂得順呢種孤獨嘅拍拖方式。
阿豪