掩人耳目

水着女優向來被視為進入藝能界嘅踏腳石，而為咗能夠上位，不少女優不惜露肉拍寫真，務求有朝一日能夠飛上枝頭變鳳凰。不過，原來成名之後亦會帶畀女優不少煩惱，好似佐佐木希同松山麻美，呢兩位炙手可熱嘅水着女優，佢哋成名後便成為狗仔隊嘅目標，搞到乜嘢私隱都冇。

佐佐木妹嘆道：「經常有狗仔隊跟出跟入，就算有心儀對象都唔夠膽拍拖，真係好慘！」松山妹同意道：「為咗可以過到感情生活，生活習慣便要作出改變。」原來兩位靚女為咗讓感情生活變得充實，不惜改變生活習慣，從原來鍾意日間活動，變成鍾意夜遊嘅夜之一族。佐佐木妹笑道：「夜晚活動就唔怕畀狗仔隊影相，夜闌人靜亦唔怕畀人撞到，可謂一舉兩得。」

山頂觀星

雖然夜晚活動可以撇開狗仔隊跟蹤，但夜麻麻可以去邊度玩呢？松山妹就話：「夜晚嘅活動雖然少，但對我嚟講就冇所謂，因為我最鍾意就係同心儀嘅男性到山頂觀星。」松山妹個樣爽朗又活潑，唔似啲咁文靜嘅人喎！松山妹笑道：「其實我以前好怕坐定定嘅活動，不過自從做咗水着女優後，為咗避開啲狗仔隊，惟有改變我嘅生活習慣。喺一次偶然嘅機會下，便愛上觀星呢個活動。」

夜晚去觀星，四野無人，對松山妹呢啲靚女嚟講，孤男寡女唔怕有損失咩？松山妹搖頭道：「我不知幾想有損失呀！自從出咗名後，經常被狗仔隊跟到實，莫講話感情空虛，就連私生活都受到影響。人哋始終係女仔嚟㗎嘛，點都會有生理需要。去到咁僻靜嘅地方，如果對方都唔識得行動嘅話，咁咪浪費機會？」原來觀星只係藉口，偷食至係真正目的！

海灘漫步

至於佐佐木妹方面，佢最鍾意就係夜遊海灘，認真浪漫！佐佐木妹面紅道：「其實我真係好鍾意浪漫嘅感覺。以前睇電視劇時，見到情侶夜遊海灘，兩個人邊傾心事，邊靜聽海浪拍岸嘅聲音，呢啲先至係戀愛嘅感覺，尤其係成為狗仔隊嘅目標後，夜遊海灘不但唔怕畀狗仔隊跟，又唔使擔心畀人認出，感覺相當自在。」

既然係咁，點解佐佐木妹又會面紅呢？佐佐木妹笑道：「咁兩個人喺無人嘅海灘，行為自然會大膽啲，平時唔敢做嘅行為，都可以喺呢個時候做。」大家唔好心邪，事關佐佐木妹所講嘅大膽，只係同男伴接吻而已。佐佐木妹認為：「喺咁浪漫嘅環境下，女性自然容易釋放自己，加上情感嘅驅使下，便容易做出親密嘅行為。如果對方識得把握機會，而地方又許可嘅話，我亦唔介意有更親密嘅接觸。」唔怪之得佐佐木妹咁鍾意去海灘啦！

撰文：阿豪