而娟媽亦唔執輸，佢套三點式異常性感，遮住身體重要部分嘅布，少得可憐，娟媽一由更衣室出嚟，已經引嚟全場男士嘅艷羨目光，連阿花都問小娟：「你阿娘平時都咁性感嘅咩？」小娟話：「佢係嚟沙灘至會發癲，至於點解？係個秘密嚟！」娟媽帶咗兩個少女，搵咗個最多男仔嘅靚位置之後，就開始塗上厚厚嘅太陽油，期間舉手投足，極具誘惑，之後再伏喺沙灘蓆上曬太陽，仲叫小娟同阿花放心去游水，於是兩個囡囡就去游水，由於兩個都係游泳健將，於是話咁快就游到出浮台。

就喺呢個時候，娟媽覺得有啲眼瞓，於是索性將比堅尼背上嘅繩打開，身旁嘅男人全部都目及住佢，阿花發現娟媽咁開放，心裏覺得好奇怪，當佢哋再由浮台游返埋岸邊之後，決定問小娟：「你阿娘點解咁開放嘅？快啲話我聽啦？」

各位聰明嘅讀者， 大家又估唔估到小娟會點答呢？

選擇：

1.想畀人目及住，等睇吓有冇男士約會佢。　　

2.想畀人目及住，等畀人簽佢做未來巨星。

3.想畀人目及住，等有冇公子哥兒睇中佢。　　

4.想畀人目及住，等啲隨身物品有人睇住。

答案：4.就係想畀人目及住，等啲隨身物品有人睇住。

解釋：娟媽習慣將啲隨身物品跟身，但又鍾意瞓覺，於是每次去沙灘佢就着得異常性感，就係要啲男士留意住佢，愈多男人目及住愈好，順便可以幫佢睇住啲嘢。咁都畀佢諗到，真係服咗佢，但除此以外，有咁多艷羨目光注視佢，應該都幾開心啩！

小德