飯局睇辦

講到識男仔，最好嘅方法當然係約出嚟食飯，事關每日都要食飯，而順便識吓男仔，既唔使浪費時間，又可趁住個幾鐘頭嘅時間內，細心觀察對方嘅言行。堀田妹笑道：「我都認為約出嚟食飯，係最好嘅識男仔方法，皆因大家可以喺呢段時間，睇吓對方嘅言行及待人接物嘅態度。」唔知堀田妹會留意對方喺飯桌上邊種言行呢？堀田妹就話：「我最鍾意睇吓對方係咪一個紳士。為咗可以讓佢哋凸顯呢方面嘅性格，我最鍾意同佢哋鋸扒。如果對方有紳士風度嘅話，當佢哋見到枱面嘅牛扒時，就會主動幫我將牛扒切開，從而體現細心及體貼嘅態度。此外，我亦會觀察對方會否幫我將餐巾鋪喺大腿上。如果佢做到呢幾點嘅話，足以證明佢係我杯茶，否則我唔會同佢有深入嘅發展。」

避免旅遊

話說回來，有啲人鍾意約埋成班男女去旅遊，一來可以去玩，二來又可以培養感情，點知兩位靚女卻異口同聲表示反對！堀田妹覺得：「如果係大班熟絡嘅朋友一齊去玩嘅話，當然冇問題。不過抱住識男仔嘅目的去旅遊，卻唔係一個好辦法。我嘅經驗話畀我知，咁樣好易因為長時間相處，而麻木咗自己，包容咗對方嘅缺點，到事後發覺原來對方同自己格格不入時，已經恨錯難返。」

愛川妹亦點頭道：「我認為去旅遊唔係一個好辦法，但我嘅觀點同堀田妹有啲唔同。我認為旅遊最大嘅問題係好易畀對方睇到你嘅缺點，而為咗掩飾自己，好多人都會扮企理、扮體貼等，只係認識到佢嘅假面具，對觀察真性情一啲幫助都冇。」

遊戲品格

從餐枱睇對方係咪體貼，果然係好計！唔知另一位靚女女優愛川妹，又鍾意用乜嘢方法呢？愛川妹認為最好就係約佢哋去打機。愛川妹解釋：「我係一個標準電玩迷，每日都要打幾個鐘頭機。多年經驗發現，男人喺打機嘅時候，會表現出真我個性。如果對方鍾意玩射擊遊戲嘅話，佢嘅性格應該比較衝動；如果對方鍾意玩解謎遊戲嘅話，則說明佢為人相當有耐性。」

有啲男士喺打機輸咗嘅時候，就會發脾氣，唔知愛川妹點睇呢？愛川妹表示：「呢種男人既小器又冇胸襟，自然唔喺我考慮之列啦！因為講到尾，呢啲只係遊戲嚟啫，使乜咁認真呢？」如果想成為愛川妹男友嘅話，大家記得打機要打得有品喇！

撰文：阿豪