沙灘之夜

今年26歲嘅工藤里紗同埋27歲嘅東原亞希，佢哋入咗演藝界都有一段日子，由於樣子甜美，身材苗條，所以追求者眾，加上讀書時期嘅狂蜂浪蝶，佢哋男友嘅數字，一定唔少，但兩女異口同聲話，自己今時今日仲係單身，連一個男朋友都冇。

我哋問吓里紗，佢拍拖時最特別嘅一次節目係乜嘢呢？里紗話：「我記得應該係高中畢業之後，同男同學兩個人揸車去沙灘，之後太夜，就喺海灘生個火過咗一晚！」咁有冇失身呀？里紗話：「當時我哋不知幾純情，兩個對望一晚已經好開心。」咁有冇啲好驚喜嘅故事呢？里紗話：「我記得有次生日，原本密麻麻嘅工作，突然取消晒，於是一個人喺屋企，點知成班同事同埋當時嘅男友出現，為我慶祝生日，我當時不知幾感動，之後仲推咗我哋入房要我哋私下慶祝，諗起都十分好笑。」

全裸現身

咁男友點同你慶祝呀？里紗笑笑口話：「咪同你哋諗嘅一樣咁慶祝囉！」咁有冇一啲要使好多錢嘅玩意呢？里紗話：「有一次有個做大生意嘅男友，因為佢之前試過失約，搞到我好嬲，佢竟租兩架直升機拉橫額向我道歉，我覺得幾得意。」我哋再問吓東原亞希，佢話：「我覺得最特別嘅一次，就係成班朋友約埋去浸溫泉，點知男朋友突然有事嚟唔到，之後我跟朋友去，半夜瞓唔着落去浸浴泉，就喺呢個時候，男朋友竟然全裸咁喺我眼前出現，我覺得十分感動，而且幾搞笑吓。」

咁之後有冇徹夜纏綿？亞希話：「你咪估吓囉！」咁平時最多同男朋友玩嘅係乜嘢呀？亞希話：「我喜歡踩單車，所以一得閒，就會推架單車呢度去嗰度去，但原來好多男仔都唔掂，踩一陣就腳軟，有次有個男仔仲踩到抽筋要送去醫院添！」

齊齊煲碟

咁如果喺屋企，又喜歡做啲乜嘢呢？亞希話：「我就比較喜歡同男友一齊睇碟，睇完之後再分享吓劇情，之後再煲另一套，咁就非常理想。」咁會唔會煲啲三級片呢？亞希笑笑口話：「都會！可以增添情趣嘛！」

再問吓亞希，有冇乜嘢玩意係覺得最貴嘅呢？亞希話：「都有好多，例如買好貴嘅飛，叫我去睇一個唔鍾意嘅歌星演唱會，我就會覺得好浪費，啲錢花得認真唔抵，另外請我去我唔想去嘅地方旅行都係一樣。」

最後問吓亞希，將來再有男朋友，最想佢同你玩嘅係乜嘢玩意呢？亞希話：「其實兩個相愛嘅人喺埋一齊，唔使玩乜嘢已經好開心，所以將來我唔會強求我嘅男友要陪我玩乜嘢，只要佢喺我身邊守候住，我就已經覺得好足夠。」

工藤里紗小檔案

出生日期：1983年10月4日

身高：162cm

三圍：34、23、33

興趣：去海邊

東原亞希小檔案

出生日期：1982年11月11日

身高：165cm

三圍：35、24、35

興趣：踏單車

撰文：小德