娟媽當然唔知道畀人跟蹤，於是照正常一早去公園跳舞，但娟媽跳咗兩首歌，就已經舉手投降，要坐喺樹蔭下回氣，一坐低就同啲師奶雞啄唔斷，攞份報紙就吹咗成個幾鐘。最後到咗九點，大伙兒去酒樓飲茶，娟媽當然跟埋去，但主要仍然係同班師奶吹水。

到咗十一點幾，娟媽就撲返屋企，睇嚟可能想睇吓小娟睡醒未，煮飯畀乖女食。小娟睇見十分感動，於是買份雜誌就回家，娟媽問佢去邊，佢就話落咗街買雜誌。之後娟媽真係煮咗個愛心即食麵畀小娟食，之後睇完財經新聞就又走咗落街，小娟當然再跟啦！

娟媽嚟到一幢舊樓嘅樓下，遇到一個健壯阿叔，兩人有講有笑咁上樓，小娟見到樓下掛咗好多招牌，其中有間係時鐘別墅，唔通娟媽同人開房，於是小娟急急腳走上去，但已唔見娟媽嘅影蹤，而小娟眼前就有四個單位，究竟娟媽入咗邊間單位呢？

選擇：1. 入咗時鐘別墅　　　2. 入咗婦科診所　　　

3. 入咗證券公司　　　4. 入咗性病專科

答案：3. 入咗證券公司

解釋：娟媽最近學啲師奶炒股票，朝早同跳舞班同學猛吹炒股心得，算就去飲茶，仍然繼續研究，之後十一點，就趕返屋企睇財經新聞，睇吓有冇升跌，之後下午再開巿，娟媽就會親自落場買賣，而佢出手嘅地方就係舊樓上嘅證券公司，所以小娟你千祈咪誤會呀！

小德