記得當年有招「巴黎鐵塔反轉再反轉」，以一個絕不普通嘅接吻，令女伴成個人倒立起嚟，睇到一眾男士眼都凸埋。今日推介呢段奇趣短片，主角嘅接吻功夫更厲害，絕對係反轉再反轉嘅「升級版」，至於升咗幾多「級」，大家睇落去就知道。
喺自助洗衣店裏面，每一部開動緊嘅洗衣機，都喺度轉嚟轉去，我哋男主角祖臣受到啟發，於是捉住老婆阿珍嚟個情深一吻。
阿珍畀祖臣一吻立即欲罷不能，祖臣見時機成熟，於是模仿洗衣機轉動再轉動，將阿珍成個人轉咗幾十個圈，成個風車咁樣。
當祖臣放阿珍落地嘅時候，阿珍已經High到頭髮冒煙，雙眼反白，最後更不支倒地，祖臣呢招風車轉，仲勁過反轉再反轉呀！
小德