服務有制度

今日就搵嚟熟悉內地夜遊行情嘅小張，講解一下內地夜場嘅規矩。小張係一個成人網站內地夜遊討論區嘅版主，佢話：「每一間夜場，無論係夜總會，定係邪骨場，佢哋都有自己一套規矩，方便管理，而喺提供服務方面，佢哋更有嚴格限制，唔可以亂嚟。」

大家比較想知提供服務上有乜嘢嚴格限制呢？小張話：「就以夜總會為例，無論你係三陪小姐、點唱員、領舞員、甚至知客或者服務生，全都有木魚同金魚之分，如果你一早講咗只係做金魚嘅，當有客人夾硬拉你去開房，夜場會出面保護你。」

小張話：「我親眼見過一單嘢，有個台商同朋友去夜總會玩，佢睇中嘅三陪女原來係金魚，個台商唔理囡囡反對，夾硬拉佢上酒店房，媽咪知道即刻通知經理，經理勸阻無效仲畀人打咗一巴，後嚟叫咗大批冇着制服嘅保安嚟，將個台商『送走』。」

會影響聲譽

啲夜場咁保護啲囡囡，為咗乜嘢呢？小張話：「如果話咗唔賣身嘅囡囡，喺你個場返工，隨便畀人夾走，你話仲邊有囡囡敢返工呀！到時知客、舞蹈員、服務生，連清潔阿姐都唔敢返嚟，個場又點做落去呀！所以就算得罪啲客都要保護啲小姐。」

除咗保護員工，仲有乜嘢其他原因呢？小張話：「據媽咪講，萬一發生咗啲不愉快嘅事，輕則公司可能畀人整頓，嚴重嘅可能畀人告佢哋逼良為娼，隨時拉人兼封艇，所以個場唔會畀客人亂嚟，當然大型夜場嘅規矩同保護會大啲，細場就會細啲。」

咁一般休閒中心，又有啲乜嘢規矩呢？小張話：「可能大家唔知，原來休閒中心無論大定細，都會有規矩，最明顯嘅一條就係除按摩技師外，其他職員係唔可以提供另類服務畀客人，而所謂嘅服務，亦都要遵照公司規定，技師同客人都要遵守。」

害間場被封

例如休閒中心係間「機場」，就只能提供「起機」嘅服務，如果技師破壞規矩，就要扣薪罰款，嚴重嘅更會即時炒魷，因為咁啱你犯規接客，畀有關方面查到，你畀人拉唔緊要，會連累個場都封埋，咁就大件事，所以呢啲規矩，唔會有人敢破壞。

當然，有人喺「機場」有過深入接觸，但都係個別事件，偷偷摸摸咁做，小張話：「就算東莞啲邪骨場，客人可以同技師深入接觸，但唔代表中心內洗腳妹同採耳妹可以抽水，就算一啲揼正骨嘅技師，畀客人抽水嘅話，後果都十分嚴重。」

小張總結：「如果客人一定要破壞規矩，經勸阻無效，就會派保安出馬，輕則趕你離開，重則畀人拉去後巷『招呼』，遇着無良保安，仲會屈你一筆，更甚者會有生命危險添！所以去玩一定要守規矩，唔守規矩嘅後果，真係無法估計。」各位老友記住啦。

撰文：小德