有名冇利

真奇怪，有名自然有利，不過脫星艾美就話呢個時勢唔係咁講，以佢為例，當年拍一套四仔，閒閒哋幾十萬港元落袋，一年拍兩三部，都夠買車買樓。但艾美妹就話自經濟倒退以來，唔單止冇新戲開，即使有戲開，都搵唔番以前個價，真係食之無味，棄之可惜。喺想拍與唔想拍之間掙扎，又點會演得好呢！阿妹都有同感：「係呀，外人睇就以為我哋好風光，扮得靚靚拍新戲，仲以為我哋唔會受經濟影響。其實完全掉轉，作為脫星，最容易受外界氣氛所累，一旦四仔迷冇多餘錢買四仔睇，我哋脫星就要降價配合。」

遊戲規則

經濟唔掂再加豬流感，艾美妹話淨係降價都搞唔掂，事關製片商認為，搵一線脫星演獨腳戲，雖然可以減低成本，但計計數，搵幾個新人一齊演出都係差唔多製作費，而且更多新鮮感，反而會刺激銷量，變相班一姐要被打落水狗。呢方面，艾美嘅姊妹艾力嘉就自言經驗豐富：「自問我入行都有五年光景，被公司打落水狗我都試唔少，皆因四仔界每日都有新脫星登場，只要經濟稍為差少少，公司就會壓價，話之你係一姐。」因此，艾力嘉妹話一早已學識收埋自己，從來都唔敢認自己係一姐，每次拍完戲，阿妹都盡量保持低調。

艾力嘉話：「對比入行初期，未懂遊戲規則，有公司捧又有影迷撐，個人好自然會飄飄然。但時間一久，影迷就會對你生厭，不論你演甚麼角色，佢哋都興趣不大，四仔自然會去貨減慢，但片酬則相對高企，喺呢個尷尬位，假如冇其他收入，都幾難繼續落去！」難怪艾力嘉妹近年積極向外發展，推出個人成人性商品，原來係為未來鋪路。

從頭做起

又要保持人氣，同時又想低調，都咪話唔矛盾，兩位一姐正處於兩難局面，艾力嘉妹選擇從商，艾美妺又點呢？「自問我就冇咁嘅膽量做生意，呢個艱難時期，我最希望自己喺四仔界嘅排名可以跌出三甲之外，不論係銷路或脫星排位都好，事關唔想被呢種虛名箍住，令自己冇機會去做其他工作。剛才艾力嘉妹都講過，當公司留意到脫星再冇上升空間時，就會放棄你，搵其他新人取代，可見四仔界相當無情，假如可以再嚟過，我希望大家當我新人看待，即使片酬少啲，但多元化發展，都好過攬住一姐之名餓死！」明白晒，今日兩位一姐都要同新人爭食，都咪話唔陰公囉！

撰文：祖