見面一拍即合

其實呢種分租式同居，喺日本興咗好幾年，好幾套青春愛情日劇，都係以咁嘅關係嚟做題材，為咗增加效果，佢哋都會安排異性住埋一間屋，但係真正嘅情況，都係同性租畀同性住，而佢哋搵租客嘅方式，通常都係貼街招或者喺網上登招租廣告。

據一間女性網站調查所得，佢哋搵咗三十對囡囡，都係分租式嘅同居者，而當中兩個人原本係認識嘅，只佔調查總數嘅四成，即係話當中有六成人，同居之前係互不認識嘅。我哋問負責調查嘅麻生小姐，點解啲囡囡咁大膽，敢同一個陌生人同居呢？

麻生小姐話：「佢哋最主要嘅原因，就係支付唔起昂貴嘅租金，急於搵人分擔，於是只要初次見面時，對方唔係太過乞人憎嘅，佢哋都會接受跟對方同住。」一般情況，佢哋見面就只有一次嗎？麻生話：「據調查所得，有七成人係見面一次就決定。」

分享物資

咁急就做決定，佢哋日後共同生活，有冇出現問題呀？麻生話：「調查結果我都覺得有啲奇怪，只有四成人覺得大家生活出現問題，而四成人當中，只有三成對出現嘅問題係解決唔到，最後要用終止合約嚟解決。」咁佢哋最常見嘅問題係乜嘢呢？

麻生話：「據調查所得佢哋最接受唔到嘅都係一啲生活習慣，但呢啲問題一般都可以解決得到，可能大家都係女仔嘅關係，生活上嘅細節，一般都比較就得人，所以最後都唔成問題。而最難解決嘅，反而係情緒嘅問題，例如有啲囡囡情緒好暴躁或者好偏激嘅，呢啲就唔係咁易解決得到，一般都係解約收場。」

咁佢哋住埋一齊，又有乜嘢好處呢？麻生話：「調查裏面，差唔多所有問卷都表示，同居生活好處好多，例如真係慳到錢。除咗租金之外，食物和日用品，甚至衣服飾物都可以慳到，例如以前係自己買自己用，有時用唔晒會浪費，但家陣就有人分擔，就可以更有效地利用呢啲物資。」

姊妹齊心

又啱喎！囡囡一人買一件新款時裝返嚟，大家可以交換着，即係畀一個價錢，可以着兩件唔同嘅靚衫，難怪個個都讚好啦！麻生補充：「另外囡囡遇上啲唔開心嘅嘢，同屋嘅囡囡一定會第一時間安慰，遇上開心嘅事，大家又會第一時間分享。」

如果一個人住，就冇人分憂，自己喊濕幾個枕頭都冇人知道。麻生強調一點：「佢哋仲好團結添，其中一個如果畀男人欺負，另一個就會幫手報仇。，另外，當有囡囡識到新男朋友，佢哋又會出動，試吓新男友花唔花心，易唔易受誘惑，所以飛來艷福嘅話，大家真係要小心啲，咪輕易上當呀！」

麻生總結：「原來囡囡之間同居生活所衍生出嚟嘅感情，有時比親生姊妹嘅感情仲要強。唔計極端到發展出愛情，愛上對方，就普通嚟計，佢哋可以為對方做好多嘢，特別係為姊妹出頭搵男人算帳，明攻暗算，無所不用其極，男士們認真要小心。」好彩呢個風氣仲未吹到嚟，否則香港嘅男士們就慘啦。

撰文：小德