胸大有阻力
做運動有益身心，從來只有聽到專家叫人多做運動，未曾聽過要戒絕其中一種，但今年22歲嘅小松彩夏妹就話情願做少啲都唔想受傷喎！憑住勻稱嘅身材及可愛樣貌，甫出道就馬上成為水着界嘅紅人，除咗上雜誌封面，阿妹更火速推出個人寫真。身材如此好嘅小松彩夏，眼見事業發展如日方中，理應感到滿足，奈何伊人卻悶悶不樂。事關一對「美乳」，令佢唔能夠玩最鍾意嘅體育運動——排球。
小松彩夏嘆咗一口氣後話：「其實我以前嘅上圍，並冇依家咁凸出，不過當我十八歲過後，上圍不斷加碼，而豐滿嘅上圍對打排球嚟講係一大障礙。起初仲可以用繃帶將佢紮住，但後來實在太過巨型，如果紮住嘅話，就會令我有窒息嘅感覺，無辦法情況下，惟有放棄至愛嘅排球運動。」真係無陰功，原來小松彩夏讀書嘅時候係一名排球女將，曾經代表學校出賽，就咁放棄實在可惜。
縮細級數
為咗重拾排球樂趣，小松彩夏最近喺接受八卦雜誌訪問時，就透露計劃縮胸。小松彩夏解釋：「我嘅目標就係將上圍降級，一來唔會影響觀賞度，二來又唔會妨礙我打排球。」不過小松彩夏呢個決定卻招來經理人公司及水着迷反對，事關佢哋擔心阿妹縮胸後，會令感官刺激度急降。對此，小松彩夏笑言：「其實都係有咁嘅計劃啫，如果大家反對嘅話，最多咪唔整囉。」不過姊妹大久保麻理子就力撐小松彩夏應該為自己實行縮胸計劃，以陰謀論睇，莫非大久保麻理子妒忌好姊妹，所以鼓勵對方縮胸？大久保麻理子妹反駁話：「當然唔係啦，因為我自己都受緊呢種苦，所以我好明白小松彩夏依家嘅心理。」
肉球阻玩球
大久保麻理子妹續話：「講大胸，我比小松彩夏更大，就算對方唔縮，我都贏梗佢，之所以叫佢縮，事關我都好鍾意做運動，尤其係踢足球，但因為上圍太浮誇，每當跑起上嚟，兩大肉球就左搖右擺，好辛苦囉！」但據知情者爆料，大久保麻理子妹並非因大肉球跑得辛苦，純粹因為觀眾眼光放喺佢身上，感到尷尬啫！咁又係嘅，啲男觀眾將大久保麻理子妹嘅胸部同足球比大細，又攞阿妹開玩笑話對方好易頂錯阿妹胸部喎！
而大久保麻理子妹就一於少理，繼續支持好姊妹馬上縮胸，佢嘅理由係：「正因為當年冇縮胸，結果我放棄咗足球運動，回想起都有啲後悔，始終做水着妹只屬我興趣，真正令我得到快樂只有足球，作為過來人，當然唔希望睇到身邊姊妹後悔啦！」明白，但若然小松妹聽你支笛去縮胸，肯定班男人會同你死過！
大久保麻理子Profile
年齡：24歲
身高：5呎4吋
三圍：36、24、35
小松彩夏Profile
年齡：22歲
身高：5呎3吋
三圍：34、24、34
撰文：祖