髮廊街重現
點解咁奇怪呢?原來係有段古,今日就同大家追擊一下。有好多人都會奇怪,髮廊妹唔係式微咗好耐咩?以前整條街都係髮廊嘅情況,真係冇咗好多年,但喺唔同嘅地方,則會有個別兩三間嘅髮廊存在,大家經常都會睇得到。
但佢哋都係小規模經營,就算當年三沙一水咁興旺,佢哋啲髮廊都唔敢開得太揚,又以常平為例,佢哋啲髮廊出晒名多囡囡,但咁耐都係隱蔽式地下經營,由此證明有關方面,對治理髮廊嘅力度,一直都管得好嚴,唔畀佢哋成行成巿咁存在。
但近呢一年,髮廊竟然好似雨後春筍喺唔同嘅小鎮出現,雖然都唔係開喺鬧巿範圍,但密度驚人,有啲地方,隔條街就有一間,有啲仲離譜嘅,就喺一條街就有六七間髮廊喺度,一到夜晚,啲媽咪同囡囡就走晒出嚟拉客,場面十分之壯觀。
黑勢力入侵
有關方面一向都整治得好好,點解呢排又會失手呢?據知情人士透露,原來同舊年地震有關,話說發生地震之後,好多劫後餘生嘅朋友,紛紛離開家園,南下廣東等地投靠親友,好多災民安頓後就喺度打工維生,但到咗九月,竟出現金融風暴。廣東省就有好幾千間工廠執笠,導致出現大量下崗民工,佢哋又冇工做,又返唔到鄉下,侷住留咗喺度。有關方面怕佢哋聚集滋事,於是對一啲事情,採取隻眼開隻眼閉嘅措施,於是男人同婦女就上街做晒小販,有啲後生女就去咗做髮廊妹。
於是由舊年年尾開始,無論係大城巿或者小鎮,都會見到一街都係小販,當你轉入橫街,就會見到梗有一間髮廊在左近,由於冇王管,於是唔係失業大軍嘅都紛紛入行,開到成行成巿,大家搵到錢,連黑勢力亦插埋隻手入去。
暴力抗執法
內地負責管理小販嘅部門就係叫做「城管」,以前小販遠遠見到佢哋就叫走鬼,家陣由於小販人多勢眾,部分仲有黑勢力撐腰,搞到小販唔怕城管。有時佢哋嚟執法,小販仲以暴力對抗,情況到咗十分嚴重嘅地步,於是有關方面決定大力整治。但小販問題,唔係三朝兩日搞得掂,於是據知情人士透露,有關方面向髮廊展開嚴打,誓要掃蕩乾淨,事關檢控佢哋比較容易,二來反對聲音較少,強力對抗嘅情況更少,容易取得好成績,於是各鎮各巿有關單位聯合行動,全力整治髮廊活動。
消息透露,短短幾日就拉咗近千人,成績驕人。相反,如果有關方面拉成千小販,一定畀傳媒或者巿民大眾叫罵,所以今次髮廊遭受嚴打,真係黑狗偷食,白狗當災。
撰文:小德