經常聽見有女士話：「邊有貓唔食魚？」意思通常係諷刺啲男人出外偷食。不過，呢隻貓唔淨指男人，亦可以係女人，事關隨着思想愈嚟愈開放，保守心態已經唔存在於好多港人嘅心目中，唯一分別係遇上第三者嗰陣，產生唔同嘅情況，例如港男會自相矛盾，而港女就立場堅定。
娟娟
怕遇索女
港男Tony：「我最怕就係遇到一啲樣靚身材正嘅女人，好似早前喺內地識咗個女人，溫柔體貼，對我照顧周到，最大鑊就明知我有老婆，佢都願意同我上床，有索女送上門，仲要任勞任怨嗰種，冇理由唔食㗎？老實講，咪話我搵藉口，每當我諗到屋企隻乸日日係咁𠵱𠵱哦哦，一係呻窮，一係講埋啲三姑六婆嘅是非，真係火都嚟埋，無論返工或返屋企都要受氣，搵番個溫柔嘅女人氹吓自己好正常啫！不過我亦都明白，就係當呢種情慾關係唔能夠用錢解決時，男人有時會將肉體滿足轉化為情感，遲早形成錯綜複雜嘅三角戀，有機會因此而離婚收場。」
立場堅定
港女Fay：「如果我未結婚嘅話，絕對唔介意有第三者向我展開追求，話晒男未婚女未嫁，點解唔可以畀多啲選擇自己？不過，如果結咗婚嘅話，就唔會咁諗法。除非老公唔要我，又或者喺外面滾到唔識返屋企，否則的話，就算遇到一個完美嘅男人，我都唔會有任何感覺，亦懂得盡量克制自己，就算唔小心同咗另一個男人上床，都只會純粹情慾關係，當中唔會產生任何情感交流。始終老公就係老公，而第三者永遠只係第三者，呢樣係不容置疑，亦唔會有任何位置上嘅改變。」