撰文：小德
家傳縫紉術
呢兩個咁本事嘅囡囡，分別係今年24歲嘅佐野夏芽，同埋一樣係24歲嘅小出由華，我哋先問吓佐野點解對縫紉咁有心得？佐野話：「我媽媽雖然只係一個家庭主婦，但佢對縫紉好有研究，加上細個嘅時候屋企好窮，所以我啲衫全都靠媽媽做。」
雖然係用啲舊布縫縫補補，但佐野反而係學校裏面最多新衫着嘅一個，佐野話：「因為只要媽媽得閒，就會用衣車造新衫畀我，反而啲同學仔唔會成日買衫，所以我啲新衫比佢哋仲要多，而且好多仲係最新款式，當時不知恨死幾多同學仔呀！」
於是乎佐野就經常坐喺媽媽嘅身邊，學佢整衫，係耳濡目染嘅情況底下，佐野學到唔少家傳絕學，到咗初中時，縫紉功力已經好耍家，而且深得當時家政堂老師嘅喜歡，仲鼓勵佢將來畢業之後去學時裝設計，本來佐野都有咁嘅打算，點知道發生意外。
陪男友隱蔽
佐野話：「咪係識咗我嘅初戀男朋友囉！佢好靚仔好斯文，對我又好體貼，但好衰唔衰，佢係個御宅族，即係放工放學後可以成日唔出房門嘅男人，所以同佢拍拖，邊度都唔使去，就陪佢喺間房裏面就可以，於是我又同佢過咗幾年隱居生活。」
後嚟佐野頂唔呢種生活，於是決定重新做人，出嚟打工，希望創一番事業，於是機緣巧合入咗娛樂圈，由於經常要見人，但自己嘅收入有限，於是佢又重新自己整衫，由於佐野根基紮實，所以造出嚟嘅衫件件都見得人，佐野自然開心到不得了。
另一個就係小出由華，小出佢因乜事又學縫紉呢？小出話：「我嘅夢想就係想做時裝設計師，因為細個時好鍾意畫公仔，當然我唔會畫啲打打殺殺嘅肌肉男，我畫親嘅都係着到靚靚嘅美少女，周不時仲替佢哋換造型，設計啲新衫出嚟。」
跟名師學藝
咁點解又唔做設計呢？小出話：「鬼叫自己讀書唔畀心機咩！當年只掛住玩，再唔係就識男仔，所以畢業之後嘅成績，根本冇職業培訓學校收我，惟有做其他工作，好彩入到呢行，由於識得人多，有個時裝設計師話肯義務教我一啲基礎。」
係咪你男朋友呢？小出面紅紅話：「我都唔知，佢睇過我畫嘅草圖之後就話我好有天分，於是叫我跟佢學，我跟咗佢兩年時間，由最基本嘅開始，學咗唔少嘢，可惜佢要去歐洲發展，咁我就冇再學落去，但家陣要我自己造衫，一啲都難我唔到。」
小出自己做嘅衫唔只見得人，仲有Fans肯出高價買添！睇嚟真係有番咁上下潛質，咁小出會唔會改行做時裝設計師呢？小出話：「我諗會啩，但呢啲嘢唔係想就可以，仲要睇吓有冇人畀機會至得嘅！」講到咁白，唔知有冇老闆肯畀機會小出呢？