年輕人少不免會年少氣盛，好似喺籃球場度咁，經常見到班後生仔，為咗打波而爭執。呢種好勇鬥狠嘅性格，雖說係成長嘅一部分，但隨着年齡嘅推移，仍然唔學會成長嘅話，可能會因此而得不償失！
話說文仔買咗架新車，諗住落街兜番幾轉，熟習一下新車嘅性能。點知當佢停喺燈位時，隔籬農夫車個司機，突然撩佢鬥車。起初文仔都唔想理佢，但見到對方身邊坐咗個靚女，即時點頭話好！
雖然文仔嗰架係新車，但相對改裝過嘅農夫車，馬力卻差咗一大截，想贏都幾難。不過文仔卻仍然應承，究竟佢打乜主意呢？只見雙方揸咗架車去郊區後，靚女便落車發號施令，比賽即刻開始。
正如先前所料嘅一樣，文仔架車慢過對方成倍。正當對方喺度恥笑文仔冇料到之際，驚見文仔打開車門叫靚女上車。原來佢一早諗定載對方女友，唔怪得會應承鬥車，對方今次真係得不償失喇！
阿豪