有人問，性生活同性格之間，到底有冇直接嘅關係？據西方嘅性心理學家講，性生活同心理有住好緊密嘅關係，如果心理質素出現問題或者偏差，都會影響性行為嘅效果，所以專家話好多人如果性格方面係有缺陷嘅，就會直接影響性生活嘅協調同美滿。即係話，有啲人由於自己嘅性格存在住某啲缺陷，就會導致跟愛侶無法達至美滿嘅性生活，對呢啲人嚟講，當遇上性生活唔協調時，最重要係唔好向愛侶抱怨，或者盲目走去學習一啲古靈精怪嘅性技巧，而係要先改正自己嘅性格。
最常見嘅例子，就係一啲從小就嬌生慣養，一直以自我為中心嘅人，因為佢哋唔懂得同別人合作，欠缺對人嘅理解同體諒，心理上根本唔識得寬恕同包容，呢種人只會喺性上面苛求對方，一旦出現矛盾，就會一直爭拗下去，唔會主動妥協，所以呢種性格嘅人好難會喺性生活上取得滿足。近年中港兩地嘅家庭都奉行少子政策，造成好多獨生小孩，佢哋自細嬌縱，好多孩子都唔識得同別人溝通同埋相處，所以喺不久嘅將來，會成為社會上普遍人士性生活嘅最大障礙同問題所在。
小德