最近有個師奶朋友問我，佢老公床事表現差勁，想問吓佢係咪性功能出現問題，睇吓要買啲乜嘢補品畀佢食吓。但當再問清楚一啲具體情況嘅時候，發現佢老公無端端瘦咗好多，而且手腳部分嘅皮膚，仲有一啲日漸嚴重嘅潰瘍出現。
我建議佢老公馬上去睇醫生，檢查吓血糖水平，事關呢啲全部都係患咗糖尿病嘅先兆，喺意大利就有一個研究發現，患有糖尿病嘅男人，其勃起機能障礙嘅比率，比起正常血糖值嘅男人高出70%，即係糖尿病人有七成機會導致性功能出現問題。
據專家講糖尿病本身好似冇乜殺傷力咁，但原來佢可能影響身體嘅神經系統、供血系統、內分泌系統，而且病患嘅心理都會受到嚴重嘅影響，以上任何一種系統出毛病，對性功能都會有影響，何況家陣一病牽連咁多組織，所以真係要小心糖尿病。
糖尿病患者仲有一種奇怪嘅表現，就係所謂「逆向射精」，即係精液唔係射出體外，而係退入膀胱，患者以為自己精子用盡，心理大受打擊，其實只係尿道分流處個「閥門」出現問題至會搞錯，總之一句，留意自己血糖水平，小心身體。
小德