分組賽最終章作客廣島三箭 東方拚盡誓省招牌

上次交鋒雙方鬥得難分難解，一度先開紀錄的東方，最終在補時階段遭對手以3比2反勝，代表出席賽前記招的主帥盧比度（Chino）期望東方繼續踢出爭氣波，於國際舞台展示香港足球的水準及形象：「雖然今場勝負對出線資格冇任何影響，但我哋代表住香港足球嚟到廣島，無論如何都要踢出香港嘅實力。最緊要留個良好印象畀海外球迷，畀大家知道東方呢隊波係『掂嘅』。」提到對手於「亞冠盃2」已經確定晉級，加上考慮到廣島三箭周日（8日）將應付日職榜首關鍵戰對陣大阪飛腳，「Chino」指球隊處於較少顧慮的優勢底下，相信可拉近雙方實力距離。

陪同出席記招的後衞黃梓浩就指廣島三箭作為日本頂尖球隊之一，實力毋庸置疑，冀與對手周旋到底：「面對咁強勁嘅對手，我哋會全力作戰到最後一刻，盡情享受今場比賽。」

至於廣島三箭則派出主教練史基比及中場青山敏弘出席賽前記招，對於上仗對陣東方時驚險反勝，史基比表示東方實力不容忽視：「上次交手已經了解到東方嘅實力，佢哋體能方面好有質素，絕對唔容易應付。不過作為主場最後一場分組賽，我哋成隊上下都戰意『爆燈』，今日肯定會出現好多火花！」目前位列日職「2哥」的廣島三箭，上輪聯賽以5比1擊敗札幌岡薩多，周日（8日）又緊接有另一場J1大戰，史基比明言今仗會作出大量輪換，但強調會繼續以強陣出擊。文嘉靖日本直擊