昔日東方標準流浪衞冕首擊巧遇理文
上屆「菁英盃」盟主流浪，今日展開衞冕之旅先鬥理文，主帥巴貝利指陣中有不少具潛力的年輕新血，盼能與強隊有力一鬥：「上場聯賽後備入替嘅Vito（黃韜霖）好活躍，製造咗唔少進攻機會，我覺得係個好開始，嚟緊每場都會擺多啲後生仔入嚟，等球隊多啲活力之餘，令大家有機會作出貢獻。」巴貝利又明言球隊今季目標依舊不變，希望晉級淘汰賽，力求衞冕。
陳冠燊做足準備大無畏
上季為流浪上陣所有「賽馬會菁英盃」賽事的門將陳冠燊，形容理文實力毋庸置疑，但強調球隊會奮力一戰，先以小組出線做目標：「上季都同理文編喺同一組，佢哋攻力強勁，絕對唔易踢，我會做足準備，盡量減少失波，希望第一場可以發揮得比上季更好，幫到球隊衞冕！」
理文各項賽事經歷兩連敗，暫代主教練朱兆基表示經過一周的備戰後，現時球隊戰意未見有影響，相信眾將已收拾好心情，重新出發：「依家每場波對大家都好緊要，我覺得球隊上下個爭勝心愈嚟愈強，最近練波睇得出大家冇畀任何負面消息影響到信心，希望落到場發揮出應有水平，爭取好成績。」
羅焯熙把握機會一展所長
後衞羅焯熙（阿Mo）明言會把握機會一展所長，期望今日能全取3分兼擺脫低潮：「『賽馬會菁英盃』係個好平台，畀年輕球員表現自己最好嘅一面，我會盡全力做好教練嘅部署，等大家睇到我哋嘅實力，希望贏番場畀球迷睇。」「阿Mo」同時盼望能有機會爭取表現，打動教練團，未來可給予自己更多上陣機會。
賽馬會菁英盃分組形勢
A組：均業北區、東方、港會、傑志、大埔
B組：標準流浪、九龍城、冠忠南區、理文
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
