昔日東方美國女足響頭炮 洛雯「施丹轉身」入波威盡
周五凌晨女奧足B組，美國女足3比0大勝贊比亞女足，明星射手洛雯表演「施丹轉身」過人後入波，表現技驚四座。衞冕嘅加拿大女足賽前雖然受到「航拍機醜聞」影響，但喺A組仍以2比1擊敗新西蘭女足，旗開得勝。
美國女足被視為金牌熱門，今仗盡展霸氣，NBA「傳奇籃板王」洛文個女洛雯，17分鐘就接應隊友傳送，禁區內一個「施丹轉身」成功避開2名敵衞包夾，成功射破贊比亞大門。「美女」領先後愈戰愈勇，再由絲雲遜入多2球大勝3比0。
喺巴黎表演法國名將施丹嘅絕技，洛雯笑稱佢嘅過人係「洛雯轉身」，佢賽後表示：「其實我冇乜練過，只係靠直覺去踢，但結果好完美，好開心我嘅計劃成功咗！」
要創自己故事
身為NBA「傳奇籃板王」嘅女兒，現年22歲嘅洛雯反而專攻足球，佢過往受訪就表示：「大家認識我，好多都係因為我爸爸。我冇諗過要超越爸爸嘅成就，只係想創造屬於自己嘅故事。」
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
