大埔射手認清方向 盧卡斯減磅增速愈戰愈強！

2015年首度來港，盧卡斯在本地賽場留下過驕人履歷，包括分別在2017/18及2019/20賽季協助傑志奪得港超冠軍，Lucas承認「藍鳥」歲月對他而言尤其值得回味，但亦留遺憾：「我喺傑志踢咗3年，依家仲有好多朋友，就算之前離開咗香港，我都有繼續關注港超，尤其係傑志嘅比賽。」如果2021年選擇留在香港，Lucas早已經成功入籍，但現實沒如果，他承認難免有遺憾：「當時我非常接近入籍，如果成功當然對我嘅職業生涯係好事，不過我試過向理文自薦，亦嘗試重返傑志，但都唔成功。」

昔日舊東家無論是傑志或東方，都被視為有力爭標的強隊，「以前踢傑志或東方，我通常只需要喺禁區內等機會，就可以入好多波。當時我攞住唔錯嘅人工，日子過得太安逸。」惟離港之後，在身邊環境的迫使下，Lucas意識到改變的必要：「去到巴西同馬來西亞搵食之後，先察覺已經跑得唔夠其他球員快，尤其馬來西亞聯賽各隊實力接近，令我意識到要好好照顧自己嘅身體。」

昔日「禁區之狐」再戰港超，Lucas只用了半季時間，就成為大埔頭號射手，亦經常為隊友做助攻，剛剛度過34歲生日的Lucas，被視為今季港超當中最佳引援之一。他指比起傑志時期，現時體重已減輕起碼7公斤，自己的心態與過往亦大有不同：「依家會更注意日常飲食，堅持去做Gym，比起2016年，我覺得依家踢得更好，可能跑得仲快過當年。」Lucas現時已是兩位子女的爸爸，這位曾被視為「麻煩友」的巴西前鋒，也承認家庭責任令他變得更成熟：「我需要為子女做榜樣，為人處事都要做好啲。」

繼2016/17賽季之後再披「綠戰士」球衣，盧卡斯說能夠與「堅Sir」故劍重逢，一切都好像似曾相識：「2016年我第一次效力大埔之前，喺南華其實踢得唔多，當時係『堅Sir』搵我過嚟。今次情況幾乎一樣，作為外援向來需要貢獻更多，但我今次重返大埔，責任更大。」今季季中加盟的盧卡斯，好快就以入球成為「綠戰士」頭號射手，認為球隊與自己有出色發揮，「堅Sir」功不可沒：「大埔今季預算唔多，我覺得可以搵到呢班咁好嘅球員，砌成一支好球隊，『堅Sir』有好大功勞，話晒佢做呢行已經超過10年。」

出色表現亦令Lucas在季尾「香港足球明星選舉」的公眾票選中，獲得頗高票數，可見其出色表現已獲球迷支持及愛戴，對此他表示：「攞獎唔容易，因為要同唔少球員競爭。我覺得自己喺呢半季表現唔錯，大家都見到我心態唔同咗，『堅Sir』亦好信任我，我仲未知今季之後會唔會留喺香港，但我希望可以再次入選最佳11人。」