卸任總監李輝立：年紀開始大

年過70歲的李輝立是日在捧走「賽馬會菁英盃」冠軍後，向在場記者透露來季將卸任標準流浪總監：「自己年紀開始大，好多球迷覺得我不合時宜，同埋好多工作負荷唔到，做完啲嘢又成日唔記得，都係時候休息吓，搵新人接棒，咁咪趁住呢個機會退落嚟囉，而接班人就要等老闆睇吓邊個合適。」

總結多年管理流浪的感受，Philip笑言心情屬於「甜酸苦辣」：「乜都試過，開心同唔開心都有，管理成隊球隊咁多人，或者搵外援全部自己一腳踢，真係非常辛苦。自己仲要做埋打雜，好似尋日熱身啲衫仲喺洗衣舖，咪自己揸架車去攞。」提到來季組軍，Philip認為部分球員開始老化，預計陣容會有一定變動，又建議球隊效法東方，嘗試重用新人。