新晉港腳孭起東方中場線 余在言努力換取存在感

Jesse今季花了不少時間隨代表隊征戰，其中去年亞運賽場上，港隊一路過關斬將，最終歷史性闖入4強，作為主力的Jesse可謂功不可沒。回想當時，Jesse表示最難忘是8強擊敗伊朗一役：「我哋當時1比0擊敗伊朗，嗰場波反映到我內心對足球嘅熱誠，顯示出我嘅爭勝心，尤其為代表隊披甲，可以喺咁重要嘅賽事，完成前人做唔嘅成績，係好Crazy！仲記得終場哨聲響起，各種情緒湧上心頭，好感恩可以參與其中。」

亞運結束後約3個月，Jesse更獲得大港腳徵召踏上前往多哈的航機，隨港隊站上更大的亞洲盃決賽周舞台。Jesse形容能夠參與亞洲盃，是他在職業生涯初期難以想像的成就：「有機會成為呢隊波嘅一分子參與亞洲盃，仲有機會喺頂級球場，代表香港企上亞洲最高舞台比賽，簡直係夢想成真，好幸運可以成為職業球員。」Jesse在多哈並未獲得太多上陣機會，但他表示未有因此氣餒，認為能走到這一步已值得高興，更不忘要「讚自己」：「過去兩年我同一隊四處征戰，但真正落場時間唔多，但我從來冇放棄或氣餒，永遠都係球隊行先，好開心一直保持呢種心態。每次上陣機會，都係我用努力換取番嚟，我知道自己為此作出唔少犧牲，付出咗汗水。」

東方近年陣容年輕化，其中作為球隊今季首位宣布新加盟的球員，余在言亦被東方寄予厚望。這位「00後」中場在新東家的開局不算一帆風順，傷病及接踵而來的代表隊賽事，讓他在季初錯過不少為球隊上陣的機會，惟他的信心未有因此動搖；進入賽季下半程，Jesse也開始獲得穩定上陣機會，更在3月底面對舊東家標準流浪的聯賽賽事，斬獲加盟東方後遲來的處子球。Jesse認為少不了球會，尤其是主教練盧比度（Chino）的信任和鼓勵：「其他球隊會將控制節奏呢個責任交畀外援，但東方希望培養年輕球員，Chino會要求我擔起更大責任，勇於表現自己，同時畀我好大自由度，令我喺場上參與更多，更有存在感。」

對於「存在感」一字，去年年初曾獲推薦赴日本跟操的Jesse，亦有過深刻體會。當時在J3球隊鹿兒島聯試腳約兩周的時間，Jesse未能為自己贏得繼續留隊的機會，但已足以讓他認識到與外界的差距：「作為球隊中場，我需要有好強嘅存在感，但喺日本踢幾場友賽，我嘗試跟上比賽節奏，但做唔到中場應有嘅表現。」

余在言強調外流的目標未有因此動搖，但那段經歷也讓他思考如何繼續職業生涯：「日本之旅畀我最大嘅收穫，除咗加強咗我想外流嘅決心，仲畀我意識到一定要進步，而唔係為做而做，我想達到有外流嘅真正水平。」圖、文：林卓臻