何思哲寄語隊友：唔好放棄

晉峰今場先落後兩球，但憑着林樂賢及何思哲的入球，一度扳成平手，滿以為可以終止連敗走勢，可惜之後又再失守。賽後「阿哲」承認戰果並不理想，但認為球隊表現已有好轉：「我哋下半場出嚟冇放棄過，所有人落到場都交足120%，亦有決心去贏，同埋踢法都立體咗，球員開始知道進攻要點做，仲入到兩球添。好開心見到訓練嘅成果，不過要控制好比賽節奏，唔好咁心急。」

「粉紅兵團」聯賽遭逢11連敗，作為隊長的「阿哲」在此艱難時刻，不忘以身作則鼓勵隊友：「今場咁輸法係有啲洩氣，但千祈唔好放棄。足球就係咁，冇人知道比賽結果係點，好似我哋今日都試過追和，只要保持認真訓練，成績自然有改善。」此外「阿哲」又提到餘下3場聯賽的目標：「每場波都一定會以贏波為前提，踢得進取啲。」