旺角場夠細安永佳盼氹仔浸蛟龍

年初隨港隊出戰亞洲盃，3場分組賽皆擔正的安永佳今場會繼續肩負攻堅重責，Matt坦言港隊經歷亞洲盃後成長不少：「我哋同強隊踢多咗比賽，期間出現一啲好成績，關鍵在於細節，依家大家建立咗自信心，知道球隊有能力同任何對手一戰，但先決條件係要做好部署。」港隊近4次與烏茲別克在世盃外交手3次打和，Matt強調會以搶分心態面對今場賽事：「我哋係有能力喺對手身上搶分，尤其喺旺角大球場比賽，細啲嘅球場，畀烏茲別克做波嘅空間會更少，對港隊會有一定優勢。」

早前安永佳轉戰加盟深圳新鵬城，成為另一位挑戰中超聯賽的港腳，一度收到多間球會邀請的Matt，就指新東家主教練的信任，是吸引他「拍板」加盟的主因：「首要條件係主教練好想我加盟，喺中超賽場前鋒位置一直由外援佔據，但我同教練傾過，佢認為我有能力爭一席位，成為球隊嘅9號仔。」Matt續指球會所在城市深圳，以及城市足球集團的背景，都是他考慮的因素：「相信我嘅直覺。」由上季中甲賽場轉戰中超，Matt希望爭取更多上陣機會，力爭在中國頂級站穩陣腳。