港台電視32 x on.cc東網同步直播 港會主場擺陣鬥香港U23

港會上場「足總盃」不敵傑志後，各項賽事錄得3連敗，中前場主力加斯特夫預計球隊今場會打得更進取，劍指3分：「今季各項賽事同香港U23已經踢咗3場，我哋攞到兩勝一和，所以今場應該可以壓得上啲，保持集中，唔好再好似首循環咁，臨尾先輸12碼，搞到贏唔到波。」

右閘積施利（Jack）就提醒隊友壓上搶攻之餘，都要小心香港U23利用反擊製造威脅。Jack又提到杜國樑離開香港U23，但相信港會未必有太大甜頭；此外，費利皮爾因累積5面黃牌要停賽。

香港U23首循環與港會打成1比1，今場當然希望繼續搶分，該隊今季已多次在仿真草場作賽，主教練司徒文俊預期球員臨場發揮，不會有太大問題：「港會場相對係細啲，但我哋習慣喺仿真草場練波，唔擔心場地問題，希望球員畀啲決心，全力去同對手比賽。」

上場傷愈復出後備入替的林智豐，有信心球隊作客港會可以交出好表現：「我哋今季幾次踢仿真草場，發揮算係比較好，相信我哋唔會畀場地影響表現。」他強調球隊要先做好防守：「港會制空力好強，唔做好防守好容易會散，尤其要盡量避免輸死球，我哋進攻嗰陣要放膽啲，保持控球權，我相信係有機會贏佢哋嘅。」