on.cc東網直播銀牌王者戰年初二最佳節目傑志東方龍年搶首冠

龍年本地波第一擊！今日大年初二在旺角大球場，上演「高級組銀牌」決賽，由傑志和東方合演上季「翻版決賽」。兩隊今季首度交鋒，誰勝誰負令人期待，「藍鳥」力爭衞冕，東方則望再嘗奪標滋味。新正頭假期，一家大細最佳節目，親身入場感受大戰氣氛！（on.cc東網周日下午3時按次收費直播）

傑志陣中多位球員早前有份參與亞洲盃及省港盃，暫代主教練金東進（Kim）透露他們身體未見大礙，連同門將保羅在內，一律可以候命，是役必精銳盡出。Kim續指東方具備競爭力，尤其前場擁有幾名高質素球員，後防有需要踢得更加謹慎，全隊上下都會專注爭取冠軍。另外，Kim又提到香港隊近期表現有明顯進步，呼籲球迷今日踴躍入場：「香港隊早前喺國際大賽，證明有力同亞洲勁旅競爭，球員表現都有好大進步，希望呢場開始，可以有更多球迷入場支持同關注本地足球。」

陳俊樂：想球迷過開心假期

中場陳俊樂剛為港隊出戰亞洲盃，3場皆正選上陣兼有水準發揮，今場決賽為其歸隊後首場賽事，他揚言必全力為「藍鳥」捧走冠軍：「喺港隊踢咗好多場比賽，狀態都有所提升，好希望可以幫到球隊贏冠軍，等球迷過一個開心嘅新年假期。」今季首次面對東方，「樂仔」認為對方屬一支強隊，反擊能力甚強，己方後防必須高度集中，避免出現一絲鬆懈。

東方有7位球員參與剛剛過去的省港盃，其中鐘樂安、黃皓雋、吳宇曦及馬希偉都有份踢次回合賽事，主教練盧比度（Chino）有信心幾位球員的體能可及時恢復：「歐洲聯賽都係隔3至4日踢一場波，球員想進步，就要適應點樣面對緊密賽程。」上季決賽對傑志飲恨，Chino希望球隊今次表現能有所提升：「對手實力唔使多講，呢場波我哋預咗唔會有太多埋門機會，如果出現就一定要好好把握，另外就係要做好防守，對住港超最強球隊，我哋肯定處於劣勢，但同時壓力亦唔喺我哋度。」中堅高素巴耶夫已經歸隊，是役可以候命。

葉鴻輝：勝負關鍵在於集中力

東方門將葉鴻輝也同意今場壓力在「藍鳥」身上，並指出勝負關鍵，在於球員能否保持集中：「尤其係開波初段要做好啲，希望踢番出上季決賽嘅水準。」上季決賽東方同傑志鬥足120分鐘，最終以互射12碼不敵對手，「阿輝」賽後淚灑球場一幕令人印象深刻，惟他否認留有遺憾：「踢波就係咁，好難估今場會唔會又要加時或者互射12碼，但係肯定會非常緊湊。」