C朗因傷缺席「球王大戰」

正進行亞洲之旅嘅國際邁亞密，今日凌晨作客艾納斯，不過全球矚目嘅「球王大戰」美斯鬥C朗，最終慘情告吹。艾納斯主帥卡斯特羅賽前證實，C朗傷勢仍然未康復，所以缺陣呢場重量級熱身賽。

卡斯特羅喺賽前記者會表示：「我哋唔會睇到C朗對美斯，C朗正處於康復療程嘅最後階段，我哋希望佢可以喺未來幾日重返大軍練習，但佢今場肯定缺陣。」由於C朗嘅小腿傷患問題，艾納斯早前已取消兩場中國熱身賽。兩大球王對上一次交鋒係喺上年1月，當時美斯效力嘅巴黎聖日耳門，以5比4擊敗C朗壓陣嘅利雅得全明星隊，美斯同C朗喺該仗都有入波。