隊友遭抨擊孫興民：請保護我哋

南韓最後階段遭馬來西亞追和，孫興民於賽後記者會表示失望：「要畀掌聲馬來西亞，佢哋一直冇放棄過，戰果梗係有啲失望，最緊要係入到16強。」南韓今屆表現未見突出，更有個別球員遭外界批評，一直以英文作答的「孫仔」，專程用韓文回應：「呢個問題想用韓文答，有件事想拜託南韓媒體，希望你哋同我哋企喺同一陣線，保護南韓隊，呢啲批評有時太過火，我哋成隊波都好Hurt，見到隊友咁痛苦我都好傷心。」

南韓以次名出線，16強避開死敵日本，賽後主教練奇連士文否認刻意「走線」：「馬來西亞3個入波中，有兩球係唔應該發生，我哋一直都係以小組首名做目標。」南韓下周三凌晨將與沙特阿拉伯爭入8強。記者林卓臻卡塔爾多哈直擊