邁亞密巡演首站門票滯銷

蘇亞雷斯上月底以自由身由甘美奧加盟國際邁亞密，並簽約1年，日前呢位37歲烏拉圭射手首次亮相球場，同美斯拍住上操練，為嚟緊嘅巡迴表演賽作準備，期間氣氛非常輕鬆，比較似敍舊多過練波。

呢次國際邁亞密以美斯作為「生招牌」嘅全球巡迴表演賽，總共踢7場之多，不過首站薩爾瓦多即遇上門票滯銷尷尬情況。據主辦單位透露，雙方合約保證美斯至少上陣20分鐘，但邁亞密索取出場費高達350萬美元（約2,700萬港元），水漲船高之下令門票定價高昂，當地球迷無法負擔最高200美元（約1,560港元）嘅「靚飛」，結果喺開波前一星期只賣出三成門票，「搞手」面臨蝕大本收場。

值得一提，雖然香港站門票火速售罄，但有個大問題，就係合約冇包美斯必定登場，據報香港站合約僅承諾「大牌球員」會登場，但國際邁亞密嘅球星仲有布斯基斯、蘇亞雷斯等，無法保證美斯一定會上陣。