足總盃8強激戰 東方 晉峰搶到盡

上季4強止步的東方，今季捲土重來，當然希望能在「足總盃」有一番作為。東方上場於聯賽擊敗勁敵標準流浪，惟主教練盧比度（Chino）認為球隊表現未如理想，強調今場面對晉峰要避免重複犯錯：「冇咩人預計到晉峰喺『足總盃』首圈可以贏到大埔，一場過嘅盃賽咩都有可能發生，我哋絕對唔會覺得對住晉峰就可以輕鬆取勝，呢場只有傾盡全力先可以贏波。」余在言、孫銘謙及葉鴻輝等主力正隨港隊操練，但Chino表示他們今場可以候命。

上周對大埔一役斬獲加盟東方後首個入球的黃浩然（Andy），就認為入波有助提升信心：「除咗改善防守表現之外，都希望喺進攻上為球隊多作出貢獻。」東方賽前被看高一線，但Andy卻認為今場盃賽仍充滿挑戰：「晉峰轉咗南韓教練之後，踢法比以往更加體力化，踢法會好直接進取，對我哋嚟講每場波都唔易應付，只有全力踢先可以攞到好成績。」

晉峰「足總盃」首圈爆冷1球擊敗大埔晉級，今場再遇另一支前列分子東方，總教練何信賢指對手近況甚弗，加上射手巴科爾狀態火熱，同樣不容易應付，一場過淘汰賽會以穩守行先，相信球隊能夠再次炮製驚喜：「年紀可能係對手嘅隱憂，馬高斯、『阿邦』（即梁振邦）幾個都大，期望年輕球員可用跑動收窄差距，希望踢得番贏大埔嗰場嘅水平，呢場如果晉到級，會對球員好大鼓舞。」值得一提，許澤崴累積5黃需要停賽，布雷迪則繼續養傷，而今場乃外援凱基的告別戰。