朱浩賢：要吸引更多球迷 見證主場作戰意義重大

北區首次在主場北區運動場出戰，球隊邀請了足總主席霍啟山等人擔任開球禮嘉賓，並進行切燒豬儀式。朱浩賢解釋由於要提升球場設施水平，令球隊到昨日才坐鎮主場出擊，他又稱長年帶領北區在各級聯賽征戰，如今終見證球隊踏上港超舞台，意義重大：「我帶咗隊波十幾年，依家終於升上港超，大家都好開心見到呢件事發生，我哋會盡力踢好波，報答球迷支持。」

朱浩賢又希望往後能吸引更多球迷入場，令社區更熱鬧：「今日邀請咗過百位來自羅湖、深圳以至大灣區嘅球迷睇波，希望之後多啲球迷入嚟睇波，做到帶旺北區同球圈。」他續指球隊12月起，將有多場主場賽事，現時已努力構思宣傳方法，目的吸引觀眾入場支持球隊。