查理史葛雲天樂 奪9月最佳金球&撲救

■■圖、文：林卓臻、李浚湣

傑志中場查理史葛（Charlie）在9月24日對標準流浪的「中銀人壽香港超級聯賽」，禁區頂對出左腳勁抽破網，為球隊全取3分。這記入球更獲選為【聚大金鳳特約】：9月份「最佳金球」，他表示十分開心，希望今季可以至少射入5球。

查理史葛繼前季在「足總盃」4強，再次面對標準流浪藉遠射建功兼榮膺每月最佳，司職防中的他笑言對流浪時腳風特別順，又對獲得每月最佳金球表示開心：「自己踢嘅位置較後，入波機會唔多，大多數只係可以憑遠射。球波好靚同幾特別，因為用左腳射入，起腳之前都有猶豫，但個波嚟到就決定試吓，最後入咗都有啲幸運。」

向來以遠射見稱的Charlie，透露自己年少時曾苦練射術，強調「成功需苦幹」：「細個屋企牆出面會畫個紅點，然後每日要分別用左、右腳各射中50次，努力付出會有成果，令到我依家遠射好有信心，今季希望至少入到5球。」

香港U23門將雲天樂（Micky）憑9月3日對晉峰一戰，撲出紀思昊的頭槌攻門，成為香港U23成功搶分的最大功臣，兼獲球迷選為【聚大金鳳特約】：9月份「最佳撲救」。這位近期一度要與傷病搏鬥的22歲門將，就認為得獎是對自己的肯定，希望復出後盡快提升狀態，協助球隊繼續搶分。

「（攞獎）意義好大！」，對於在季初奪得「最佳撲救」，Micky感到非常鼓舞。他踢完該場聯賽後，就隨U22港隊遠赴烏茲別克，出戰U23「亞洲盃」外圍賽，惟他不幸地在烏茲別克傷及手指，檢查後證實骨裂： 「自己都好唔開心、好失落，已經6個星期冇機會練波，都好期待可以盡快再落番球場。」訪問當日，Micky正準備去醫院作X光檢查：「其實我感覺應該好快OK ，已經感覺唔到痛楚！」好消息是他終於等到醫生「開綠燈」，在上場面對標準流浪一戰後備上陣復出。

回想起那記精彩撲救，Micky承認自己都難以置信：「個波傳中之前，我已經見到紀思昊楔緊前柱，所以佢未頂之前，我已經做好撲救準備，咁啱個波喺手頂附近，撲完嗰下我仲同隊友講笑，話唔信自己咁都可以撲到。」在Micky神勇演出下，香港U23最終0比0賽和晉峰，收穫今季聯賽第1分。