港台電視32 x on.cc東網同步直播基藍馬最後探戈傑志強戰標準流浪

「中銀人壽香港超級聯賽」今日上演重頭戲，傑志坐鎮旺角大球場與標準流浪正面交鋒。「藍鳥」剛在「亞冠盃」分組賽落敗，今仗返到聯賽當然力爭重拾勝軌；但流浪已經休戰接近3星期，體力充滿，加上今仗為基藍馬的職業生涯告別戰，為公為私，隨時能為球迷帶來驚喜。（港台電視32及on.cc東網周日下午3時直播）

傑志接連不敵理文、全北汽車，各項賽事遭遇兩連敗，總監兼主教練朱志光指未感太大壓力，相信今仗可以及時反彈：「流浪今年強咗好多，但唔會強得過全北汽車，我對班球員有信心，佢哋經驗豐富，落到場知道點踢，幾時攻、幾時守。不過9日3戰係辛苦嘅，預計會有4至5個調動。」陣容方面，明加索夫、伊高沙托尼有傷在身，連同獲放行參與亞運的潘沛軒，今仗同樣未能披甲。

祖連奴倒戈「好興奮」

前鋒祖連奴剛在對全北汽車一仗，後備上陣約30分鐘，他表示體能已大致恢復，與新拍檔恩查的默契亦愈來愈好。首次倒戈標準流浪，他表示十分期待：「離開流浪之後，第一次同佢哋交手，真係好興奮。流浪今季實力依然，但我落到場一定盡力幫傑志贏波！」

標準流浪上輪聯賽完場前被大埔絕殺，吞下今季首敗，主教練王家中（Henry）希望球員可以吸取教訓，即使在比賽尾段亦要保持集中。傑志近況即使麻麻，加上又要舟車勞頓，但Henry卻未敢掉以輕心，強調球隊會先做好防守：「傑志有足夠休息時間，我唔認為佢哋體能方面會輸蝕。控球在腳同主攻唔係我哋強項，反而對方後防高大但速度比較慢，憑伊巴謙等人嘅速度，打反擊更有優勢。」

盧均宜︰有機會偷到雞

值得一提，林衍廷、李毅凱因隨港隊出戰亞運缺陣，而林遼太則背傷上陣成疑。盧均宜承認對防守有一定影響，但有信心可以「有分落袋」：「傑志啱啱踢完亞冠都會攰，又有幾個傷兵，同見到佢哋對住理文有唔少犯錯，今場有機會偷到雞嘅。」另外，流浪昨晚透過Fb專頁宣布，是役為老將基藍馬職業生涯最後一戰。