體育

加盟冠忠南區圓夢去到盡 李小恆職業足球大冒險

為了足球,你肯去到幾盡?李小恆(Raphael)為專心朝足球發展,上季季中向大學申請退學,結果約半年後成功轉會至冠忠南區,加入一間具職業規模的球會。也許在旁人眼中,Raphael暫時取捨學業的決定十分冒險,但對Raphael而言,這個可能是容易不過的選擇:「書可以遲啲先讀,但我呢世可能只得一次機會,去挑戰職業足球咋!」
很多人對李小恆第一印象,都是來自他出身自巴黎聖日耳門及阿積士青年軍的背景,不過他澄清一切是「美麗的誤會」,實際上他只曾到這兩支球隊試腳跟操,PSG期間突然遭受傷患,導致幾個月不能踢足球,及至試腳後不獲取錄,其後在阿積士的經歷,更令Raphael得到寶貴教訓。他指當時被爭勝心沖昏頭腦,以致無法在試腳期間管理情緒:「當時練習賽一落後,就開始發脾氣,甚至想放棄,雖然爸爸提我要保持集中,爭取表現吸引球隊簽我,但真係一句都聽唔入耳!」
最終Raphael因其態度問題,未能與阿積士青年軍簽約,他苦笑道:「嗰陣爸爸好嬲,差唔多幾個禮拜都唔肯同我講嘢。」到2016年,Raphael跟隨母親到香港生活,而Raphael的足球夢,正是在這顆東方之珠實現,他去季代表半職業的港會出戰港超,今季則轉投冠忠南區,他感嘆:「如果舊年有人同我講,1年後有得踢冠忠南區,我可能唔敢相信,而且唔係好多球隊,會將寶貴嘅外援名額,用喺經驗唔深嘅球員身上,所以好多謝球隊咁信任自己。」
不惜退學留港征戰
記者去季上半季曾訪問Raphael,他當時透露去年為大學「空檔年」(Gap Year),讓自己得以出戰港超,如今Raphael繼續留港征戰,他解釋為了追逐足球夢,上季季中已退學:「其實可以揀Online Learning,但兩地時差真係好難搞,如果以咁嘅方式讀落去,可能要由香港時間晏晝五點,上到凌晨兩三點㗎。」
眼見Rapahel決定退學,家人起初難免感到擔心,但Raphael始終對職業足球十分嚮往,繼而打動家人支持其決定:「上年難得可以喺港會展開職業生涯,我唔想因為讀書,搞到冇得繼續踢,因為呢世可能只得一次機會,去挑戰職業足球,同埋屋企人好明白足球對我嚟講有幾重要,好彩依家同南區簽咗約,總算令佢哋放心啲。」
盡力踢好波應付挑戰
Rapahel成為南區一分子後,將要與艾華及羅拔奧度等猛將爭正選,不過他已準備好應付挑戰:「依家條路好清晰,就係盡力踢好波,即管睇吓我嘅職業生涯可以行到幾遠!」這個就是李小恆,一位奮力追逐夢想的男孩。
圖、文:鄧文滔
速度是李小恆(右)其中一個強項。速度是李小恆(右)其中一個強項。
速度是李小恆(右)其中一個強項。
Raphael為夢想搏盡!Raphael為夢想搏盡!
Raphael為夢想搏盡!
Raphael視巴黎聖日耳門為愛隊。(受訪者圖片)Raphael視巴黎聖日耳門為愛隊。(受訪者圖片)
Raphael視巴黎聖日耳門為愛隊。(受訪者圖片)
第一手消息請下載on.cc東網 iPhone/ iPad/ Android/
人人做記者
爆料方法 :
爆料熱線:
(852) 3600 3600
傳 真:
(852) 3600 8800
SMS:
(852) 6500 6500