互射12碼險勝港大重奪大專盃

理大今場改由顏翱天把關，陳靜謙夥拍甘智健扼守中路，陳潤潼任右閘，容昊、李俊諺坐鎮中場，入球重任落在陳傲軒、吳栢希身上。港大門將續起用盧兆崎，劉君正坐鎮中場，鄭進泓負責攻堅，余在言則先列後備。

兩隊今場踢得謹慎，埋門不多，以「窿窿」完上半場。換邊後港大換入兩名超聯兵葉凱傑、余在言，但戰況未有大變，直到補時階段理大陳靜謙罰球直射最為近磅，但被盧兆崎橫身撲出，法定時間踢成0比0要踢加時。加時上半場理大司敬熙「兩黃一紅」離場，惟打多一人的港大未有太多優勢，而鄧匡廷門前黃金機會又頂斜，結果120分鐘仍未分高下，要以互射12碼分勝負。港大頭5輪雖然有鄧匡廷宴客，但理大卻有甘智健、葉凱傑射失，最終港大12碼贏4比3，相隔一屆再次捧走「大專盃」。

頭場女子組冠軍戰則上演去屆「翻版戲碼」，由香港城市大學面對香港理工大學。由於女子組決賽首次在旺角場舉行，氣氛相當不俗，結果城大憑曾浩恩、李穎欣及黃子盈各建一功，以3比0取勝，順利衞冕。

圖、文：李浚湣