冠忠南區迎晉峰各不相讓

南區3連勝之餘全部力保不失，主教練鄭兆聰（Ricky）認為防守已重回正軌，惟他指晉峰實力比季初時更強：「佢哋中前場用波能力係強咗，我哋防守一定要再做好啲。」南區近期以杜馬思頂替受傷的杜度，川瀨浩太（Kota）表示享受與新拍檔合作：「我同杜馬思可以互補不足，默契亦愈嚟愈好。」Kota又指晉峰實力有所提升，強調更重要是做好本分：「以前同陳肇鈞合作過，知道佢嘅實力，費利浦薩更加唔使講，面對任何對手我哋都要專注做好自己。」

晉峰近兩仗聯賽半場皆踢和對手，但最終卻全失3分，總教練何信賢指逼搶踢法對體能消耗很大，盼球員可吸收經驗：「南區近期防守好出色，尤其李嘉耀踢番右閘，杜馬思亦夠硬淨，我哋會努力爭取入球。」陣容方面，除上場兩黃一紅的曾仲楠坐波監，劉君正亦因出戰「大專盃」而缺陣，伍家揚則上陣成疑。

卡爾特納（Tena）近期為球隊串演中堅，他承認這並非自己最佳位置，但最重要是能幫助球隊。Tena又指南區攻力強勁：「佢哋擅長高空轟炸，史提芬彭利拿同鞠盈智都要小心提防。我哋身形可能輸蝕啲，但唔代表會放棄，有信心保持到清白之身。」