on.cc東網直播B組出線關鍵戰 標準流浪傑志谷盡駁火

標準流浪上輪「菁英盃」不敵東方，目前以4分落後排第2的傑志，出線形勢岌岌可危，今場必須贏波才能保住晉級希望。技術顧問米路指今季多次交手，球隊不落下風，關鍵一戰有信心贏波而回：「之前喺聯賽幾次都同傑志咬得好緊，首循環『菁英盃』仲贏過佢哋，加上佢哋只要最後一場贏波，都可以首名出線，戰意可能冇咁大，我覺得五五波嚟。」

陳耀祖剛在對香港U23的聯賽，攻入生涯處子球，這名U22小將坦言入波令自己信心大增，是役盼盡力幫助球隊贏波：「想繼首循環再贏多傑志一次，當然好有挑戰性，尤其費蘭度同周緣德身形比較大隻，進攻時要諗方法點樣避開佢哋，唔好埋身碰撞。」

首循環面對流浪曾以1比2落敗，傑志總監兼主教練朱志光表示，會提醒球員避免無謂犯規，以免讓對手靠死球攻勢取得甜頭。「朱Sir」又指今場壓力全在對手身上：「佢哋一定要贏，踢法上難免要搶攻，同時間我哋就算失分，都仲有最後一場對東方，希望班年輕球員落場放膽啲。」陣容方面，新加盟的門將艾尼卡爾買合木提，已完成註冊並可候命，惟米基爾累積5黃要停賽。

江展民早前曾因事離港數月，上輪分組賽為他相隔約4個月後，再次為「藍鳥」上陣，這名多哥混血小將坦言仍需時間重拾狀態：「知道今場關乎出線，但賽前冇話太大壓力，因為我哋踢緊傑志，同埋屬於專業運動員，慣咗無論對咩對手，落到場都要搏盡，同諗住點樣幫球隊贏波。」