深水埗再撼冠忠南區 晉峰抖夠強戰理文

深水埗上場「賽馬會菁英盃」在下半場連失5球，最終大敗予南區，助教鄧冠研認為球員需要改善心理狀態，以及加強防守積極性。今場在杜國榆、陳靜謙刑滿復出下，「鄧Sir」盼能夠搶分而回：「上場一次過無咗兩個主力中堅係困難，特別係佢哋嘅身高，可以幫手頂頭槌；不過見到球隊失波前嘅表現唔太差，一路都咬住，對面機會唔算太多，只係一失就倒水咁，今場調整番絕對有得踢。」

南區上場於「賽馬會菁英盃」火力全開，以5比0輕取深水埗，取得球隊踏入2023年後最大勝仗，今場於聯賽次循環再碰頭，主教練鄭兆聰認為戰況會有所改變，但仍會以穩固防守為先：「呢場波我哋都要小心防守，今季對過幾次，對手都知道南區係點踢，所以我哋都會考慮喺踢法上進行改變，但無論如何目標只得1個，就係要贏波。」

艾華早前赴京處理入籍手續，現時已返港與球隊會合，今場可以候命。（周日下午3時開賽）

晉峰上場聯賽不敵同級對手標準流浪，總教練何信賢直言感到有點洩氣，但經過兩星期休息後，球員已收拾心情，今場面對前列分子理文，希望有分落袋：「之前8日3戰球員真係好攰，抖多一星期之後，大家對比賽嘅渴求感係強咗；不過理文換咗教練隊形明確咗，兩翼分工更加清晰，近況都相當唔錯，加上佢哋為咗爭冠軍，一定會出最強陣容，但我哋會嘗試拎分。」

理文在曾昭達接過帥印後，各項賽事已取得4連勝，包括上場於「賽馬會菁英盃」以兩球擊敗港會，提前鎖定4強席位。「達Sir」指出經過冬季轉會窗後，晉峰陣容已有不少變化，並形容今場對「黃黑軍團」而言會是全新挑戰：「晉峰新加入嘅陳肇鈞同一班外援，首循環我哋都未對過，所以肯定會有未知之數，但我會更加關注球隊嘅臨場發揮。」受傷患困擾的新兵施沙，今場很大機會倦勤，黃俊皓及洛迪古斯等亦仍未痊愈。（周日晚6時開賽）