陳晉一開齋兼奠勝：呢球好重要！

上場「地標戰」踢了約10分鐘的陳晉一，今場面對卡拉奧拉體育會繼續有份列入大軍名單，並於57分鐘後備入替。「一仔」落場後表現活躍，於83分鐘接應隊友左路傳中，在12碼點附近搶點頂入，入球後隨即獲球迷熱情擁抱慶祝，最終帶領球隊以1比0勝出這場護級大戰。賽後他接受本報記者越洋訪問，直言心情仍未平復：「依家好興奮，第二次上陣就入波，真係完全無諗過！我對上一次頭槌入球，已經係2019年7月對南區嘅『Ｕ18足總盃』。呢個入波對自己同球隊都好重要，因為拎3分對護級非常關鍵，又振奮到大家士氣。」

兩隊今場一直互無記錄，後備上陣的「一仔」透露教練當時的指示十分簡單：「落場嗰陣仲有大約30分鐘，佢叫我進取啲，都畀幾大自由度我，包括有波就自己試吓一對一，盡量起多啲腳，而隊友出波嗰陣就入去接應同逼搶。」「一仔」續指自己更加適應西班牙的比賽節奏，但今季目標「無諗啲咩」，只希望爭取更多上陣時間，以及替球隊護級成功。

皇家伊倫聯全取3分後，以30分排第14位，暫時脫離降班區域，球隊周日（26日）晚上將作客ＳＤ盧干尼斯。